Niveli global i detit u rrit në nivele të paparashikuara vitin e kaluar, siç u bë e ditur nga NASA përmes një publikimi. Agjencia hapësinore kishte parashikuar që niveli i ujit do të rritej me 0,43 cm në vitin 2024. Por matjet tregojnë se shkalla e rritjes së vitit të kaluar ishte në fakt shumë më e lartë se kjo, me nivelin e detit që u rrit me 0,59 cm.
Sipas NASA-s, kjo rritje ‘e papritur’ erdhi si pasojë e një ngrohje jo të zakontë të oqeanit, e kombinuar gjithashtu me shkrirjen e akullnajave.
“Rritja që pamë në vitin 2024 ishte më e lartë se sa prisnim”, tha Josh Willis, një studiues i nivelit të detit në Laboratorin Jet Propulsion të NASA-s në Kaliforninë Jugore. “Çdo vit është paksa i ndryshëm, por ajo që është e qartë është se oqeani vazhdon të rritet dhe ritmi i rritjes po bëhet gjithnjë e më i shpejtë.” Që nga viti 1993, nivelet globale të detit janë rritur me 10.1 cm. Dhe nëse vazhdojnë të ngjiten me këtë ritëm, qindra qytete me popullsi të dendur në mbarë botën mund të zhyten nën ujë.
Vitet e fundit, rreth dy të tretat e rritjes së nivelit të detit ka ardhur nga shkrirja e shtresave të akullit dhe akullnajave, ndërsa një e treta vjen nga ngrohja e oqeanit. Sidoqoftë, në vitin 2024, u vu re një ndryshim i këtyre fenomeneve, sipas Nadya Vinogradova Shiffer.
“Duke qenë se viti 2024 ishte më i nxehti i regjistruar ndonjëherë, oqeanet janë ndikuar gjithashtu duke arritur nivelet e tyre më të larta në tre dekada”, shpjegoi ajo. Duke përdorur një seri satelitësh që vëzhgojnë oqeanin, NASA ka regjistruar nivelet e detit në mbarë botën që nga viti 1993. Që atëherë, shkalla e rritjes vjetore të nivelit të detit është më shumë se dyfishuar – dhe gjërat vetëm sa do të përkeqësohen.
Bazuar në normën aktuale, NASA ka parashikuar gjithashtu rritjen e nivelit të detit gjatë 15 viteve të ardhshme. Në mënyrë shqetësuese, parashikimet e tyre sugjerojnë se ne mund të shohim një rritje tjetër prej 7 cm të nivelit të detit deri në vitin 2040.
