Shtesa e fundit e 65 ekzoplanetëve në NASA Exoplanet Archive ka bërë që të arrihet një tjetër moment histork shkencor: tashmë është e konfirmuar se ka më tepër se 5,000 planetë përtej sistemit tonë diellor.
“Nuk është thjesht një numër.” tha Jessie Christiansen, drejtues shkencor në arkivë dhe shkencëtar studiues në NASA Exoplanet Science Institute. “Secili prej tyre përfaqëson një botë të re, një planet të ri. Unë emocionohem shumë për secilin sepse ne nuk dimë akoma asgjë rreth tyre.”
Diversiteti i ekzoplanetëve përfaqëson popullata planetësh shumë ndryshe nga ajo që ne kemi zbuluar në sistemin tonë diellor. Në to përfshihen planetet shkëmbore më të mëdha se Toka të quajtura super-Toka dhe disa planet të tjerë të quajtur mini-Neptunë.
Shkencëtarët kanë zbuluar gjithashtu disa planetë të tjerë që orbitojnë yje të vdekur ose më tepër se dy yje. Në ekzoplanetët e konfirmuar, 30% e tyre janë lëmshe gjigande të gazta, 31% janë super-Toka dhe 35% janë të ngjashëm me Neptunin. Vetëm 4% e tyre janë shkëmborë të ngjashëm me Tokën apo Marsin.
Në 65 planetët e rinj të zbuluar, shumica janë super-Toka apo mini-Neptunë dhe shoqërohen nga disa planetë të nxehtë me madhësi sa Jupiteri. Midis tyre gjenden gjithashtu dhe dy planetë me madhësinë e Tokës, por nxehtësia në sipërfaqjen e tyre shkon deri në 327 gradë Celsius, pra janë të pabanueshëm.
