Gjatë kohëve të fundit kemi folur shpesh herë për Mira Muratin, e cila aktualisht është CTO në një ndër kompanitë me zhvillimin më të madh në botë, OpenAI. Murati ka patur një kontribut mjaft të rëndësishëm në suksesin e kompanisë së inteligjencës artificiale, dhe pas këtij suksesi të madh tashmë ajo do të jetë pjesë e Akademisë së Shkencave të Shqipërisë.
Drejtuesi i ASHSH, Skënder Gjinushi e prezantoi Mira Muratin si një anëtare të jashtme të këtij institucioni, dhe në një postim në adresën zyrtare të ASHSH, ai paraqiti një përmbledhje të karrierës së saj.
Ermira (Mira) Murati është studiuese e drejtuese ekzekutive në degëzimet më të reja të shkencave të informatikës; përgjegjëse në të mirënjohurën “Open Artificial Inteligence” që nga viti 2018.
Pas një bashkëpunimi të suksesshëm si studiuese prej më shumë se shtatë vjetësh dhe u bë zyrtari kryesor i teknologjisë, duke udhëhequr punën në ChatGPT.
Është supervizore e përparimeve teknike dhe e drejtimit të projekteve shkencore parësore të “Open AI”, duke përfshirë zhvillimin e modeleve dhe mjeteve të avancuara të inteligjencës artificiale.
Me emrin e saj lidhen arritje nga më të rëndësishmet në zhvillimin e disa prej produkteve më të shquara të “Open AI”, duke përfshirë serinë e modeleve gjuhësore të “Transformerit të Paratrajnuar Gjenerues” (GPT).
Veprimtaria e saj përfshin shtyrjen e kufijve të mësimit të makinerive, ndërkohë që mbron përdorimin e përgjegjshëm e etik të teknologjive të AI.
Është vlerësuar nga autoritetet teknologjike për një aftësi të shkëlqyer të demonstruar për të mbledhur me sukses ekipe me ekspertizë teknike, mendjemprehtësi tregtare dhe gëzon një vlerësim të thellë për rëndësinë e misionit, duke ndihmuar në ndërtimin e disa prej teknologjive më emocionuese të AI, të papara ndonjëherë më parë.
Rekomandues janë akademik Anastas Angjeli dhe prof. Dhimitër Tole, që e cilësojnë kandidaten si një nga personalitetet më të njohur sot në fushën e zhvillimeve teknologjike dhe të inteligjencës artificiale.
