Një studim i ri ka hedhur dritë mbi mënyrën se si shijet tona muzikore ndryshon me moshën. Studimi, i realizuar nga disa universitete dhe bazuar në të dhënat e 40,000 përdoruesve të Last.fm gjatë një periudhe 15-vjeçare, përfshiu mbi 1 milion këngë të luajtura rreth 542 milion herë.
Rezultatet tregojnë se adoleshentët kanë një gamë të gjerë dëgjimi, duke eksploruar hitet e reja dhe një shumëllojshmëri artistësh e zhanresh. Në kalimin drejt moshës madhore, kjo gamë zgjerohet edhe më tej, por me kalimin e viteve fillon të tkurret. Të rriturit më të moshuar vijojnë të ndjekin muzikë të re, por kryesisht brenda zhanreve të tyre të preferuara, ndërsa nostalgjia bëhet një forcë kryesore.
“Kur je i ri, dëshiron të përjetosh gjithçka. Në festivale nuk shkon vetëm për një grup të caktuar, por për të provuar sa më shumë muzikë. Ndërsa në moshën e rritur, zakonisht ke gjetur një stil me të cilin identifikohesh,” shpjegon Alan Said, profesor i asociuar në Universitetin e Gothenburgut. Ai shton se për shumicën e 65-vjeçarëve, eksplorimi i muzikës së re nuk është më prioritet.
Një element interesant i studimit ishte fakti që playlist-at e të rinjve përmbanin shumë këngë të përbashkëta mes bashkëmoshatarëve, ndërsa ato të të moshuarve ishin më të kufizuara, por më unike.
Studimi ngre edhe pyetje mbi mënyrën se si shërbimet e rekomandimit muzikor – si Spotify – ndikojnë në shijet tona. A po na ndihmojnë të zbulojmë këngë të reja, apo thjesht po na ofrojnë më shumë nga ajo që tashmë njohim?
Sipas Said, rekomandimet duhet të përshtaten sipas grupmoshave: të rinjtë mund të përfitojnë nga kombinimi i hiteve të fundit me muzikë më të vjetër që ende nuk e kanë zbuluar; të rriturit kërkojnë një balancë mes të resë dhe të njohurës; ndërsa të moshuarit preferojnë sugjerime të personalizuara që pasqyrojnë nostalgjinë dhe shijet e tyre specifike.
