Në një thirrje publike Komisioni Qendror i Zgjedhjeve në Shqipëri i bën ftesë të gjithë të rinjve që janë përdorues të përditshëm të pajisjeve teknologjike si smartphone, kompjuter, tablet të bëhen pjesë e personelit teknik që do të përdorë pajisjet për identifikimin elektronik të zgjedhësve në ditën e votimit.
Për të rinjtë kjo është një mundësi për të dhënë kontributin e tyre qytetar në mbarëvajtjen e proçesit zgjedhor të datës 25 Prill 2021. Kjo detyrë e operatorit teknik lidhet vetëm me përdorimin e pajisjes për identifikimin elektronik të zgjedhësve dhe nuk ka përfshirje në proçedurat e Komisionit të Qendrës së Votimit.
Për t’u bërë pjesë e personelit teknik ju duhet të përmbushni disa kushte të listuar në faqen zyrtare të KQZ dhe nëse ju i plotësoni këto kushte nuk duhet të nguroni. Puna një ditore do të vlerësohet me një shpërblim prej 9,000 lekë.
Aplikantët do të përzgjidhen sipas Bashkisë ku kanë vendbanimin dhe do të trajnohen nga një personel i kualifikuar.
