Bashkimi Evropian ka gjobitur Meta me një shifër rekord prej €1.2 miliardë pasi u konstatua se kjo kompani kishte shkelur privatësinë e të dhënave të përdoruesve evropian duke i transferuar ato drejt SHBA.

Ireland’s Data Protection Commission (DPC), rregullatori që siguron mbrojtjen e të dhënave të qytetarëve evropian, tregoi se ndryshimet e bëra nga Meta në vitin 2020 pas ankesave të DPC nuk adresonin rreziqet që vinin me transferimin e këtyre të dhënave. Gjoba më e madhe e vënë para atij të ditës së hënë mbahej nga Amazon në 2021, e cila u gjobit me €746 milionë nga rregullatori i Luksemburgut.

Ky vendim vjen pas presionit të vazhdueshëm që BE po tenton t’i bëjë kompanive të mëdha në mënyrë që ato të ndalojnë transferimin e të dhënave të qytetarëve evropianë në SHBA. Të njejtin veprim SHBA e kanë praktikuar me TikTok, duke ndaluar transferimin e të dhënave të përdoruesve amerikanë drejt Kinës.

“Ne jemi tepër të zhgënjyer që jemi e vetmja kompani e dënuar për përdorimin e një mekanizmi ligjor që po përdoret nga qindra kompani të tjera në Evropë.” tha Nick Clegg, drejtues i marrëdhënieve globale në Meta.

Tashmë DPC i ka vendosur një afat 5 mujor kompanisë që të ndalojë transferimin e të dhënave drejt SHBA. Pritet që Meta ta apelojë këtë vendim.