Një raportim i ri nga Counterpoint Research ka zbuluar se pothuajse 80% e të gjithë përdoruesve të orave smart që kanë një iPhone kanë blerë dhe përdorin dhe një Apple Watch.
Përdoruesit e Google Pixel gjenden në vendin e dytë në këtë renditje, pasi 71% e tyre përdorin gjithashtu një Google Pixel Watch, ndërkohë që midis përdoruesve të Samsung kjo vlerë është shumë më e ulët.
Vetëm 40% e përdoruesve të smartphone-ve Samsung përdorin një smartwatch Galaxy, tregohet në raportin e publikuar. Gjatë 3-mujorit të katërt në vitin 2022 Apple shiti një Apple Watch për çdo 3 iPhone, ndërkohë që Samsung shiti vetëm një Galaxy Watch për çdo 10 smartphone Samsung në SHBA.
“Apple dhe iOS dominojnë tregun e smartphone-ve në SHBA dhe përdoruesit e iPhone-ve parapëlqejnë që të përdorin produktet e tjera të Apple për shkak të ndërlidhjes mjaft të lehtë midis tyre.” tha analisti Matthew Orf. “Sipas shumicës së përdoruesve të Apple Watch, arsyeja kryesore për zgjedhjen e këtij produkti është sepse e pëlqenin kompaninë.”
3 shërbimet më të përdorura në orat smart janë ndjekja e aktiviteteve gjatë ditës, aksesi i njoftimeve si dhe dërgimi i mesazheve apo kryerja e telefonatave. Tepër të përdorura janë dhe shërbimet si monitorimi i rrahjeve të zemrës, i gjumit si dhe nivelit të oksigjenit në gjak.
