Në javët e fundit, Elon Musk ka sugjeruar se X mund të ndalojë së qeni i aksesueshëm në Evropë, për të shmangur rregulloren e re të miratuar nga Komisioni Evropian.
Musk nuk po arrin dot të përshtatet me detyrimin për t’u pajtuar me Aktin e Shërbimeve Dixhitale, tha një person i njohur me kompaninë. Personi shtoi se miliarderi i Tesla kishte diskutuar thjesht për heqjen e disponueshmërisë së aplikacionit në rajon ose bllokimin e aksesit për përdoruesit në Bashkimin Evropian.
Kjo do të ishte e ngjashme me mënyrën se si Meta po bllokon njerëzit në Evropë që të përdorin aplikacionin e saj të ri, Threads. DSA hyri në fuqi në gusht dhe kërkon që platformat e mëdha në internet si X të kenë sisteme efektive dhe transparente për moderimin dhe heqjen e informacionit të rremë, mashtrues dhe të dëmshëm. Me një valë dezinformatash në lidhje me luftën Izrael-Hamas duke u bërë shpejt virale në X, platforma ndoshta është tashmë në shkelje të DSA.
Komisioneri i BE-së Thierry Breton tha javën e kaluar se Komisioni Evropian po “hetonte zyrtarisht përshtatjen e X” me ligjin e ri dhe kishte kërkuar zyrtarisht informacion të detajuar nga platforma mbi veprimet e saj për të zbutur dhe hequr informacionet e dëmshme.
Kjo nuk është hera e parë që Musk ka hedhur idenë për të kufizuar në mënyrë drastike përhapjen e aplikacionit. Pothuajse menjëherë pas blerjes së kompanisë, ai sugjeroi si një masë për uljen e kostove kufizimin e operacioneve të X vetëm në SHBA, thanë dy persona të tjerë të njohur me kompaninë. “Kjo është një pjesë e arsyes që ai shkatërroi ekipet ndërkombëtare në rastin e parë që pati,” tha një nga njerëzit e njohur, duke iu referuar disa prej mijëra punonjësve që Musk kishte pushuar që nga marrja në dorë e kompanisë.
