Lamborghini po shpreson se do të jetë në gjendje të prodhojë makina me motor me djegie të brendshme dhe pas vitit 2030, ndërkohë që të gjithë prodhuesit e tjerë të makinave kanë deklaruar se do të fokusohen më tepër në prodhimin e makinave elektrike.
CEO Stephan Winkelmann dha një deklaratë për gazetën gjermane “Welt am Sonntag” gjatë kësaj jave. “Pas hibridizimit, ne do të presim dhe do të shikojmë nëse do të jetë e mundur që të ofrojmë mjete me motor me djegie të brendshme përtej vitit 2030. Një mundësi do të jetë ‘mbajtja gjallë e makinave me djegie të brendshme’ përmes karburanteve sintetike.”
Megjithatë, dhe nëse Lamborghini vendos që të vazhdojë me prodhimin e makinave me motor me djegie të brendshme pas vitit 2030, shitja e tyre mund të jetë shumë e vështirë në disa vende të caktuara. Në SHBA dhe në vende të tjera, qeveritë kanë filluar të planifikojnë ndalimin e shitjes së makinave me djegie të brendshme duke filluar që nga gjysma e kësaj dekade.
Kjo do të ishte një lëvizje në drejtim të kundërt me pothuajse të gjithë industrinë automobilistike, e cila po shkon drejt elektrifikimit.
Gjermania ka bërë disa përjashtime për makinat që përdorin karburant sintetik, mirëpo asnjë prej kompanive nuk po e prodhon këtë alternativë në shkallë të gjerë.
