WhatsApp, në pronësi të Meta Platforms, është një nga aplikacionet më të përdorura të mesazheve në botë, me mbi 2.5 miliardë përdorues aktivë. Fillimisht u lançua si një alternativë ndaj SMS kundrejt një pagese $1 në vit, por në vitin 2016 kjo tarifë u hoq dhe që atëherë aplikacioni është ofruar falas për përdoruesit. Edhe pse të ardhurat e përfituara nga WhatsApp janë modeste —rreth 1.3 miliardë dollarë në vit, më pak se 1% e të ardhurave totale të Meta-s—kompania vazhdon ta konsiderojë WhatsApp si një pjesë kyçe të strategjisë së saj afatgjatë.
Si arrin WhatsApp të përfitojë para kur ofrohet falas?
Burimi kryesor i të ardhurave të WhatsApp-it është API për Business, që u mundëson kompanive të mesme dhe të mëdha të komunikojnë lehtësisht me klientët. Kompanitë paguajnë për mesazhet në varësi të vëllimit dhe vendit ku ndodhen. Edhe pse përpjekjet për të sjellë përdorues nga Facebook dhe Instagram kanë qenë kryesisht të pasuksesshme, API-ja ka pasur rritje të qëndrueshme organike, duke kaluar kohët e fundit nivelin e 1 miliardë dollarëve në vit.
Një tjetër burim i rëndësishëm është reklamat “Click-to-WhatsApp”, që gjenerojnë rreth 10 miliardë dollarë në vit. Këto reklama, të shfaqura në Facebook dhe Instagram, të çojnë direkt në bisedë me një biznes në WhatsApp dhe janë veçanërisht të suksesshme në vendet në zhvillim. WhatsApp po teston gjithashtu funksionin Channels, që lejon shpërndarje të përmbajtjes për shumë ndjekës njëkohësisht, dhe pritet të monetizohet në të ardhmen.
Në disa tregje si India dhe Brazili, WhatsApp Pay lejon dërgimin e parave mes përdoruesve falas, ndërsa bizneset kërkojnë komisione për transaksionet. Ndërkohë, metadata që mbledh aplikacioni—edhe pse mesazhet janë të enkriptuara—i shërben Meta-s për përmirësimin e sistemeve të saj të reklamave në gjithë ekosistemin e vet.
Meta po zbaton gjithashtu mjete të fuqizuara nga inteligjenca artificiale, si chatbot-e falas dhe reklama të personalizuara, për të tërhequr më shumë biznese dhe për të rritur të ardhurat.
Në fund, edhe pse fitimet direkte janë të ulëta, Meta e sheh WhatsApp-in si një aset strategjik për të ardhmen, falë bazës së madhe të përdoruesve dhe të dhënave që ofron.
