Pas vitesh vonese, Google thotë se i ka dhënë fund planit për eliminimin e cookies të palëve të treta – një praktikë e përdorur prej kohësh nga reklamuesit në browser-in e saj të Chrome.
Cookies janë pjesë të vogla kodi që faqet e internetit i shpërndajnë me browser-in dhe qëndrojnë aty teksa personi viziton sajte të tjera. Kjo praktikë ka nxitur pjesën më të madhe të ekosistemit të reklamave dixhitale, për ta bërë reklamimin sa më të personalizuar për nevojat e përdoruesve.
Në vitin 2020, Google tha se do t’i jepte fund mbështetjes për ato cookie deri në fillim të vitit 2022 pasi të kuptonte se si të adresonte nevojat e përdoruesve dhe reklamuesve dhe të krijonte mjete për të lehtësuar zgjidhjet.
Për ta bërë këtë, Google nisi iniciativën e saj “Privacy Sandbox” për të gjetur një zgjidhje që mbron privatësinë e përdoruesit dhe lejon që përmbajtja të mbetet lirisht e disponueshme në ueb. Google tha në janar se ishte “jashtëzakonisht i sigurt” për sa i përket “Privacy Sandbox”, që në thelb do t’i ndante përdoruesit në grupe bazuar në sjellje të ngjashme shfletimi, që do të thotë se përdoruesit nuk do të gjurmoheshin individualisht po nëpërmjet grupeve të caktuara, duke rritur dhe privatësinë.
Por në qershor 2021, Google e shtyu afatin kohor, duke i dhënë industrisë së reklamave dixhitale më shumë kohë për të krijuar planet për reklama të synuara për më shumë privatësi. Më pas, në vitin 2022, kompania tha se reagimet kanë treguar se reklamuesve u duhej më shumë kohë për të kaluar në zëvendësimin e cookies të Google, duke pretenduar se kjo do të ndikonte ndjeshëm në bizneset e tyre.
Në një postim në blog të hënën, kompania tha se kishte marrë reagime, si nga reklamuesit ashtu edhe nga rregullatorët, që informuan vendimin e saj të fundit për të anuluar planin për të hequr cookies të palëve të treta në Chrome. Kompania tha se përmes testimit, kuptoi se tranzicioni kërkon “punë të rëndësishme nga shumë pjesëmarrës” dhe do të ndikonte te reklamuesit dhe pothuajse këdo që përfshihet në reklamat në internet.
