Kina lançoi të martën grupin e saj të parë të satelitëve të internetit që do të jenë pjesë e një konstelacioni që shpreson se do të rivalizojë Starlink të SpaceX.
I njohur si “Thousand Sails“, konstelacioni përbëhet nga një grup prej më shumë se 15,000 satelitësh në orbitën e ulët që Kina ka thënë se do t’i përdorë për të ofruar internet satelitor.
Një raketë bartëse Long March 6A u ngrit nga qendra e lëshimit Taiyuan në provincën veriore Shanxi të Kinës për të dërguar 18 satelitët e parë në hapësirë, sipas Akademisë Kineze të Shkencave, e cila e quajti misionin një sukses të plotë. Deri në vitin 2025, Kina po synon të vendosë 648 satelitë në fazën e parë të ndërtimit të konstelacionit për të krijuar një rrjet interneti me mbulim global, sipas medias shtetërore CCTV.
Ky shërbim pritet të rivalizojë në mënyrë të drejtpërdrejtë Starlink, të zhvilluar nga SpaceX i Elon Musk dhe OneWeb, i cili është në pronësi të firmës evropiane Eutelsat.
Nisja e një konstelacioni që ofron internet nënvizon ambiciet e mëdha hapësinore të Kinës dhe përpjekjen e Pekinit për të sfiduar dominimin e SHBA-së në këtë sektor ndërsa beteja teknologjike midis dy kombeve zgjerohet.
Në vitin 2020, Kina përfundoi rrjetin BeiDou, një grup satelitësh që formojnë një sistem global navigimi për të rivalizuar Sistemin e Pozicionimit Global (GPS) në pronësi të qeverisë amerikane, i cili përdoret gjerësisht në të gjithë botën.
Sonda hënore e Kinës Chang’e-6 u kthye në Tokë të martën, duke sjellë përsëri mostrat e para nga ana e largët e pa eksploruar e Hënës. Pekini ka paraqitur gjithashtu planet për të dërguar misionin e tij të parë me ekuipazh në Mars në vitin 2033.
