Google ka bërë një lëvizje surprizë duke krijuar një formë “paqjeje teknologjike” me Apple: Pixel 10 tani mund të përdorë Android Quick Share për të dërguar dhe marrë skedarë përmes AirDrop të iPhone-ve. Ky është një hap i madh drejt bashkëpunimit mes dy ekosistemeve që tradicionalisht kanë qenë të mbyllura ndaj njëra-tjetrës. Aktualisht funksioni është i kufizuar vetëm te Pixel 10, por Google thotë se planifikon ta zgjerojë edhe në pajisje të tjera Android.
Sipas Google, ky integrim është realizuar plotësisht nga vetë kompania, pa ndihmën e Apple. Inxhinieri Alex Moriconi tha se implementimi është zhvilluar brenda Google, është kontrolluar nga ekipet e brendshme të privatësisë dhe sigurisë, dhe më pas është testuar edhe nga një firmë e pavarur. Pra, Google duket se ka ndërtuar një mekanizëm kompatibil me AirDrop, pa pasur nevojë për bashkëpunim zyrtar me Apple.
Për përdoruesit, procesi është i thjeshtë: pajisja Apple duhet të ketë aktivizuar opsionin “anyone for 10 minutes” në AirDrop, në mënyrë që Pixel 10 ta shohë dhe të nisë transferimin përmes Quick Share. I njëjti parim vlen edhe anasjelltas, pajisjet Android mund të marrin skedarë nga Apple për sa kohë që kanë të aktivizuar “everyone for 10 minutes” ose janë në modalitetin “receive”.
Ende nuk dihet nëse Apple ishte i përfshirë apo jo, dhe kjo ngre pyetje të mëdha: a do ta konsiderojë Apple këtë një shkelje teknike dhe a do të nxjerrë një përditësim që e bllokon funksionin? Nëse kjo ndodh, mund të rihapet debati i vjetër mes sigurisë së mbyllur të Apple dhe qasjes më të hapur të Google. Për momentin, Google ka bërë hapin e pare, tani mbetet të shihet si do të reagojë Apple.
