Wikipedia, përmes organizatës së saj mëmë Wikimedia Foundation, po përqafon inteligjencën artificiale gjenerative për të përmirësuar platformën e saj, duke ruajtur në të njëjtën kohë misionin thelbësor të ofrimit të njohurive të besueshme. Në vend që të zëvendësojë kontribuesit njerëzorë, Wikimedia synon të përdorë AI-n për të mbështetur komunitetin global të redaktorëve dhe vullnetarëve duke ulur barrierat teknike dhe duke automatizuar detyrat e përsëritura. Qasja mbetet ndihmuese, jo plotësisht automatike, duke e vënë gjithmonë njeriun në qendër.
AI gjeneruese do të përdoret për të ndihmuar moderatorët dhe “rojtarët” që ruajnë integritetin e përmbajtjes së Wikipedia-s, si dhe për të përmirësuar mënyrën se si informatat zbulohen dhe organizohen. Kjo do t’u japë redaktorëve më shumë kohë për detyra më të rëndësishme si gjykimi I përmbajtjes. Një përdorim kyç do të jetë përkthimi i automatizuar i artikujve, duke përshpejtuar lokalizimin e temave të përbashkëta dhe duke mbështetur misionin shumëgjuhësh të Wikipedia-s.
Wikimedia planifikon gjithashtu të implementojë një sistem mentorimi të udhëzuar nga AI, për të ndihmuar në trajnimin e kontribuesve të rinj dhe zgjerimin e komunitetit vullnetar. Pavarësisht zhvillimit të AI-së, Wikimedia thekson se komuniteti njerëzor që ka ndërtuar Wikipedia-n gjatë 25 viteve të fundit mbetet pasuria më e madhe e saj – diçka që asnjë model AI nuk mund ta zëvendësojë.
Për të udhëhequr këtë integrim të AI-së, Wikimedia ka përcaktuar disa parime udhëzuese: të mbetet një proces i përqendruar te njeriu, të përdorë modele AI me burim të hapur dhe të sigurojë transparencë, veçanërisht në trajtimin e përmbajtjes shumëgjuhëshe.
Ndërkohë që kompanitë e AI-së mbështeten gjithnjë e më shumë në përmbajtjen e Wikipedia-s për të trajnuar modelet e tyre, Wikimedia vëren një ngarkesë të shtuar në infrastrukturën e saj. Për të mbajtur komunitetin të informuar, ajo ka krijuar një faqe të re që shpjegon strategjinë e saj për AI-n.
