Toyota planifikon të përdorë një teknologji të re për të fuqizuar rover-in hapësinor i cili pritet të përdoret për herë të parë në Hënë. Qëllimi është që akulli që gjendet në Hënë të shndërrohet në një burim energjie në të ardhmen.
Japonia është tashmë pjesë e programit Artemis të NASA dhe planifikon të dërgojë astronautë në Hënë në gjysmën e dytë të këtij dhjetëvjeçari. Kjo gjë ka nxitur Toyota që të bashkëpunojë me Japan Aerospace Exploration Agency për të krijuar një rover hënor me emrin “Lunar Cruiser” i cili mund të jetë gati për t’u testuar në vitin 2029.
NASA pret që Japonia të sigurojë një rover hënor pikërisht në vitin 2029 si një kontribut për programin Artemis. Teknologjia që ky rover do të përdorë për t’u fuqizuar përbëhet nga një motor elektrik si në automjetet elektrike, por karburanti gjenerohet në një hapësirë të veçantë ku hidrogjeni ndahet nga një katalizator për të prodhuar energji elektrike.
Toyota tha se teknologjia e saj do të përdorë energjinë diellore dhe ujin për të prodhuar hidrogjen dhe oksigjen përmes elektrolizës gjatë orëve të ditës dhe qelizat e karburantit për të furnizuar energji elektrike gjatë natës.
Një natë në Hënë zgjat rreth 14 ditë tokësore, kështu që me ndihmën e teknologjisë roveri hënor do të jetë në gjendje të udhëtojë për shumë ditë në një shtrirje edhe kur është errësirë dhe jashtëzakonisht ftohtë. Roveri pritet të jetë në gjendje të mbajë dy astronautë për 42 ditë në vit në një mision dhe të qëndrojë në gjendje funksionale për 10 vjet.
