Google ka nisur zyrtarisht garën e madhe kozmike të inteligjencës artificiale. Kompania po zhvillon prej vitesh një projekt sekret kërkimor të quajtur Project Suncatcher, me qëllimin ambicioz për të “zhvilluar machine learning në hapësirë”. Sipas CEOs Sundar Pichai, Google synon të nisë vendosjen e qendrave të para të të dhënave në orbitë që në vitin 2027, të furnizuara drejtpërdrejt nga energjia diellore.
Pichai tha në një intervistë për Fox News Sunday se faza e parë do të përfshijë dërgimin e serverëve në hapësirë, për t’i testuar në kushte hapësinore. Nëse gjithçka shkon sipas planit, Google do t’i zgjerojë këta mini-data center dhe gradualisht do të ndërtojë infrastrukturë të plotë kompjuterike në orbitë. Brenda një dekade, ai parashikon se do të jetë normale që qendrat e të dhënave të ndërtohen jashtë Tokës.
Ky drejtim i ri vjen në një moment kur industria e teknologjisë po përballet me kritika të forta për ndikimin mjedisor të AI. Sipas Programit të Kombeve të Bashkuara për Mjedisin, inteligjenca artificiale ka një kosto të rëndësishme ekologjike: nxjerrja e mineraleve të rralla për prodhimin e çipave, sasitë masive të mbeturinave elektronike, përdorimi i ujit për ftohjen e serverëve dhe emetimet e gazeve serrë nga qendrat e të dhënave.
Google beson se zhvendosja e një pjese të kësaj infrastrukture në hapësirë mund të zvogëlojë ndjeshëm gjurmën mjedisore. Përfitimi kryesor është energjia diellore virtualisht e pakufizuar, të cilën kompania synon ta shfrytëzojë drejtpërdrejt në orbitë. Pichai madje deklaroi se deri në vitin 2027 shpreson që një TPU, çipi i personalizuar i Google për AI, të operojë jashtë atmosferës së Tokës.
