SpaceX duket se nuk ka dëshirë të largohet nga qendra e vëmendjes. Ajo çka deri dje kërkonte muaj e fonde, sot po kthehet në një shërbim më se të zakonshëm.
Vetëm 4 ditë pas lançimit të astronautëve në ISS, kompania ngre në qiell një tjetër raketë Falcon 9 me setin tjetër të satelitëve në bord. Fluturimi i gjashtë për Starlink për këtë vit i cili e çon numrin e satelitëve të saj në orbitë në afërsisht 500.
Raketa e përdorur edhe katër herë të tjera të suksesshme u ngrit në ajër nga stacioni Cape Canaveral Air Force dhe teksa çante qiellin duke ndezur retë dha një spektakël të bukur dritash për banorët dhe turistët.
Ulja me sukses e raketës në anijen dron “Just Read the Instructions” shënoi rikuperimin e 53-të të suksesshëm të kompanisë.
Satelitët e rinj janë pajisur me errësues dhe teknologji të tjera për të minimizuar reflektimin e diellit, kjo pas ankesave të shumta të observatorëve nëpër botë.
SpaceX ka leje të hedhë në orbitë 12,000 satelitë për shërbim të fuqishëm interneti. Pas fluturimit të 12-të kur pretendohet të jenë bërë 720 satelitë në orbitë, në fund të këtij viti do të fillojë të japë shërbim komercial për veriun e Shteteve të Bashkuara të Amerikës dhe Kanadanë.
