Sipas një sondazhi të publikuar gjatë kohëve të fundit është bërë e ditur se sistemi operativ më i ri nga Windows, Windows 11 është më pak i përdorur se sistemi operativ 20 vjeçar Windows XP.
Ky sondazh është kryer nga kompania menaxhuese e IT, Lansweeper. Përmes produkteve të saja të software-it, kompania skanoi 10 milionë pajisje Windows gjatë këtij muaji për të zbuluar se çfarë OS po përdornin ato.
Rezultatet treguan se vetmë 1.44% e pajisjeve të skanuara kishin të instaluar Windows 11, një përqindje më e ulët se ajo e pajisjeve që kishin të instaluar Windows XP (1.71%). Nga ana tjetër, Windows 10 ishte sistemi më i përdorur nga 80.34% të këtyre personave.
Sigurisht që numri i përdoruesve të Windows 11 është i ulët, por ne mund të vëmë re se ky numër është trefishuar nga muaji janar, ku OS më i ri ishte i instaluar në vetëm 0.52% të pajisjeve. Vlen gjithashtu të theksohet se nuk ka ende një studim në shkallë të gjerë, pasi studime të tjera pretendojnë se shkalla e adoptimit të Windows 11 është në 19.4%, ndërkohë që Valve tregon se shkalla e përdorimit është aktualisht në 16.8%.
Lansweeper tregoi se produktet e tyre përdoreshin 20% nga sistemet e kompanive dhe 80% nga kompjuterat e klientëve normalë. Kompania tregoi se shkalla e adoptimit të këtij versioni ishte shumë e vogël për shkak të kërkesave të hardware të sistemit operativ.
Windows 11 vjen në rrugë zyrtare vetëm në pajisjet 4 ose 5 vjeçare.
