Në ditët e sotme bateritë më të përdorura, që nga smartphone-t e deri tek makinat elektrike janë bateritë e litiumit. Mirëpo disa shkencëtarët në TU Wien kanë krijuar një lloj të ri baterie që fuqizohet nga lëvizja e joneve të oksigjenit.
Edhe pse këto bateri nuk mund të arrijnë dot densitetin e energjisë të gjeneruar nga bateritë e litiumit, bateritë me oksigjen kanë disa avantazhe. Fillimisht këto bateri kanë një jetëgjatësi shumë më të madhe, pasi kapaciteti i tyre nuk ulet me kalimin e kohës si në bateritë me litium.
Gjithashtu, përdorimi i materialeve jo të djegshme shmang një problem që haset jo rrallë herë tek bateritë me litium, atë të shpërthimit në flakë. “Ne kemi patur shumë eksperiencë me materialet qeramike, prandaj menduam t’i implementonim ato në bateritë e reja me jonet e oksigjenit.” tha Alexander Schmid nga TU Wien.
Materialet e qeramikës të studiuara nga këto shkencëtarë mund të thithin dhe të çlirojnë jonet e ngarkuara negativisht të oksigjenit. Kur aplikohet një voltazh elektrik, jonet e oksigjenit lëvizin nga një pllakë qeramike drejt tjetrës, e kështu në vazhdim, duke gjeneruar energji elektrike.
Një tjetër avantazh është dhe mospërdorimi i mineraleve të rralla si kobalti apo nikeli. Megjithatë avantazhi më i rëndësishëm është ai i jetëgjatësisë së baterisë. Në baterinë me jone oksigjeni, nëse oksigjeni humbet për shkak të reaksioenve anësore, mund të rekuperohet nga oksigjeni që gjendet në ambient, duke bërë që bateria të jetojë për më tepër kohë.
