Startup-i britanik SolarBotanic Trees ka dizenjuar disa pemë metalike 7 metra të gjata me një tendë me panele diellore në pjesën e sipërme për të gjeneruar elektricitet dhe për të karikuar makinat elektrike.
Këto “pemë” arrijnë të kapin energjinë diellore përmes “gjetheve” fotovoltaike dhe mund të ruajnë energjinë e gjeneruar në trungun e tyre. Deri më tani kompania ka arritur të krijojë një prototip me madhësi më të vogël dhe po planifikon të krijojë version në përmasat origjinale para se të nisë prodhimin në masë para fundit të këtij viti.
Me rritjen e kërkesës për pika karikimi për makinat elektrike në Mbretërinë e Bashkuar, SolarBotanic Trees dëshiron të bashkëpunojë me ofruesit e infrastrukturave të karikimit për të adresuar këtë problem. Kompania ka arritur që tani të regjistrojë porosinë e parë prej 200 “pemësh” nga Raw Changing Group.
Pemët me panele diellore ofrojnë një zgjidhje më të kënaqshme për syrin në krahasim me panelet tradicionale diellore dhe janë më të përshtatshme për ambientet publike pasi zënë më pak vend. Sigurisht ato mund të zbukurojnë dhe hapësirat e hoteleve luksoze, qendrave tregtare apo zyrave të një korporate.
SolarBotanic Trees pritet të kushtojnë $22,000 deri në $30,000 dhe kanë një kapacitet gjenerues energjie prej 5kW. Megjithatë duhet të shpjegojmë se makina juaj nuk do të mund të karikohet aq shpejt sa në pikat e karikimit të shpejtë.
