AGCM (Autoriteti Italian i Konkurrencës)ka gjobitur Apple dhe dy nga njësitë e saj me 98.6 milionë euro, duke e akuzuar kompaninë amerikane për abuzim me pozitën dominuese në tregun e aplikacioneve mobile. Sipas rregullatorit, Apple ka shkelur rregullat evropiane të konkurrencës përmes App Store, ku mban një “dominim absolut” në marrëdhëniet me zhvilluesit e aplikacioneve të palëve të treta.
Hetimi ndaj gjigantit teknologjik u hap në maj të vitit 2023 dhe lidhet me politikat e privatësisë të zbatuara nga Apple që prej prillit 2021. AGCM pretendon se kompania ka penalizuar zhvilluesit e jashtëm duke u imponuar atyre një politikë më kufizuese të privatësisë krahasuar me atë që zbaton për shërbimet e veta. Në qendër të çështjes është sistemi App Tracking Transparency (ATT), përmes të cilit Apple kërkon që aplikacionet e palëve të treta të marrin pëlqim të posaçëm nga përdoruesit për mbledhjen dhe lidhjen e të dhënave për qëllime reklamimi.
Sipas AGCM-së, kushtet e ATT-së janë vendosur në mënyrë të njëanshme, dëmtojnë interesat e partnerëve të Apple dhe nuk janë proporcionale me objektivin e mbrojtjes së privatësisë që kompania pretendon. Rregullatori thekson gjithashtu se procesi nuk përputhet plotësisht me rregullat e privatësisë dhe se zhvilluesit janë detyruar të dublikonin kërkesat për pëlqim për të njëjtin qëllim, duke krijuar barriera shtesë dhe disavantazh konkurrues.
Nga ana e saj, Apple ka deklaruar se nuk është dakord me vendimin dhe se ai shpërfill përfitimet e rëndësishme të privatësisë që ofron ATT për përdoruesit. Kompania thekson se ky sistem u krijua për t’u dhënë përdoruesve kontroll më të thjeshtë mbi ndjekjen e aktivitetit të tyre në aplikacione dhe faqe të ndryshme, dhe se rregullat zbatohen në mënyrë të barabartë për të gjithë zhvilluesit, përfshirë vetë Apple.
Apple ka bërë të ditur se do ta apelojë vendimin, duke riafirmuar angazhimin e saj për mbrojtjen e fortë të privatësisë. AGCM shtoi se hetimi ka qenë kompleks dhe është zhvilluar në koordinim me Komisionin Evropian dhe autoritete të tjera ndërkombëtare të konkurrencës.
