Roboti më i avancuar humanoid në botë tashmë mund të shikohet duke larguar dorën e një njeriu kur ai futet në hapësirën personale të tij. Roboti Ameca është ndërtuar nga kompania britanike e quajtur Engineered Arts, të cilët update-ojnë vazhdimisht kanalin e tyre në YouTube me video të reja.
Një studiues afron gishtin drejt fytyrës së Ameca (i cili është shumë i ngjashëm me robotët në filmin I, Robot me Will Smith) deri në momentin kur roboti kap dorën e tij dhe e largon nga fytyra.
Engineered Arts shpreson se Ameca do të përfaqësojë të ardhmen e robotëve pasi për momentin ai përdor teknologjinë më të avancuar në human-robotics. “Ne fokusohemi në sjelljen e teknologjive inovative, të cilat janë të besueshme, modulare dhe të thjeshta për t’u zhvilluar më tej.” tha Engineered Arts në webpage-in e tyre. Kjo kompani u themelua në 2005 dhe roboti i tyre i parë ishte një aktor.
Për sa i përket zhvillimit të fundit, kompania tha: “Ameca reagon sa herë që gjërat futen në hapësirën e tij personale. Kjo gjë po na tremb dhe ne në Engineered Arts që jemi të mësuar me këtë robot!”
Kjo kompani prodhon gjithashtu një kokë robotike, të njohur si Adran, i cili ka 22 aktivizues që e lejojnë të lëvizi sytë dhe gojën njësoj si një njeri.
