Të gjithë fermerët e dijnë shumë mirë se sa e vështirë është të mbrosh të mbjellat nga barërat e këqija, të cilat mund të pengojnë rritjen e këtyre të mbjellave. Për fat të keq, këto barëra nuk duhet të eleminohen duke përdorur herbicide pasi në këtë mënyrë ndotet ambienti si dhe rrezikohet shëndeti i njerëzve, prandaj duhet të hiqen një nga një me dorë.
Megjithatë një startup i ri me emrin FarmWise ka gjetur një zgjidhje për këtë problem: robotët që përdorin inteligjencën artificiale për të eleminuar barërat e këqija pa dëmtuar të mbjellat.
“Ne kemi një popullsi që po rritet dita-ditës, dhe nuk mund të zgjerojmë burimet e ujit të pijshëm që kemi, prandaj ne duhet të rrisim efiçiencën në industrinë bujqësore.” tha themeluesi i kompanisë Sebastien Boyer. “Unë mendoj se inteligjenca artificiale do të luaj një rol tepër të rëndësishëm në këtë drejtim”.
Momentalisht kompania ka krijuar dy super robotë të quajtur Titan dhe Vulcan, të cilët mund të eleminojnë në mënyrë shumë efektive dhe në pak kohë barërat e këqija nëpërmjet qindra teheve të vogla me të cilat janë pajisur, pa dëmtuar aspak të mbjellat e tjera.
“Gjithçka vjen nga preçizioni. Ne do të punojmë për të kuptuar më mirë nevojat e bimëve dhe të marrim vendime të zgjuar për secilën prej tyre. Në këtë mënyrë ne mund të përdorim për të njejtën madhësi toke më pak ujë, më pak kimikate, më pak pleh, ndërkohë që prodhojmë më tepër ushqime në krahasim me ditët e sotme. Ky është misioni që kemi.” tregon Boyer.
