Kompania Evropiane e Prodhimit të Gjysmëpërçuesve (ESMC), një fabrikë e re e prodhimit të mikroçipëve që do të ndërtohet në Dresden, Saksoni, do të jetë e para që do të prodhojë të ashtuquajturat çipa me performancë të lartë në BE. Kjo gjë u bë e ditur nga presidentja e Komisionit Evropian Ursula von der Leyen në një vizitë pranë fabrikës.
“Kjo qendër e re kualifikohet sipas Aktit Evropian të Çipave si një strukturë e parë në llojin e saj. Ajo do të prodhojë produkte që nuk janë të pranishme ose të planifikuara në asnjë objekt tjetër në të gjithë Evropën. Kjo do të thotë se ky objekt ka gjithashtu të drejtën për mbështetje financiare kombëtare, “tha Von der Leyen, duke shtuar se Komisioni Evropian ka miratuar një masë ndihmuese prej 5 miliardë eurosh për të mbështetur ESMC në ndërtimin dhe funksionimin e fabrikës së saj.
Fabrika e re do të prodhojë të ashtuquajturat çipa me performancë të lartë, duke përdorur teknologjinë ‘FinFET’ dhe duke lejuar integrimin e disa veçorive shtesë në një çip. Çipat e prodhuar do të ofrojnë performancë më të mirë, ndërsa në të njëjtën kohë reduktojnë konsumin total të energjisë.
ESMC – një sipërmarrje e përbashkët midis Taiwan Semiconductor Manufacturing Company (TSMC), Bosch, Infineon dhe NXP – është planifikuar të funksionojë me kapacitet të plotë deri në vitin 2029 dhe pritet të prodhojë 480,000 çipa – të përdorur për aplikime automobilistike dhe industriale.
