Një kompani britanike ka prezantuar traktorin e parë në botë që përdor si karburant vetëm bajgat e lopëve. Mjetet New Holland T7 Methane Power do të fuqizohen nga gazi prej metani të lëngshëm, i pari në llojin e tij, i cili mund të ulë ndjeshëm shpenzimet për mirëmbajtjen e fermave në Mbretërinë e Bashkuar.
Traktori thuhet se ka të njejtën performancë me traktorët e tjerë të fuqizuar nga nafta, dhe mund të fuqizohet nga një tufë e vogël lopësh prej 100 krerësh. Mbetjet e lëshuara nga këto kafshë duhet të grumbullohen në një ambient mbajtës biometani që instalohet në fermë.
Më pas gazi i çliruar trajtohet, kompresohet dhe shndërrohet në një karburant që lëshon shumë pak emëtime në ajër. Depozita kriogjenike në traktor e ruan metanin e lëngshëm në temperaturën -162 gradë duke i ofruar të njejtën fuqi veprimi traktorit sikur të përdorte naftën për karburant, ndërkohë që çliron shumë më pak emëtime.
Ky traktor inovativ u krijua në një bashkëpunim midis kompanisë mëmë të New Holland, CNH Industrial dhe Bennmann, e cila prej një dekade ka studiuar dhe prodhuar biometanin. Gjatë fazës testuese u pa se emëtimet vjetore për mirëmbajtjen e një ferme në Cornwall u ulën nga 2500 ton në vetëm 500 ton në vit.
“Ne kemi treguar përmes traktorit tonë potencialin e biometanit dhe se si mund t’i bëjmë fermat tona të prodhojnë vetë energjinë e nevojshme duke emëtuar sa më pak gaze të dëmshme.” tha bashkëthemeluesi Chris Mann.
