Një printer gjigant 3D, i cili është mjaftueshëm i madh sa për të printuar një shtëpi, është prezantuar në University of Maine.
Ky universitet tregon se printeri i ri është katër herë më i madh se printeri 3D që mbante rekordin e mëparshëm. Fabrika e së Ardhmes 1.0 (FoF 1.0) mund të printojë objekte 29m të gjata – afërsisht sa gjatësia e një balene blu. Por ekspertët thonë, megjithë përparimin, shumica prej nesh do të vazhdojnë të jetojnë në shtëpi me tulla dhe llaç.
Printerët e mëdhenj 3D, kryesisht janë projektuar për të printuar pjesë të caktuara të shtëpisë, dhe jo të bëjnë printimin total të saj sipas Dr Eujin Pei, i cili është ekspert në prodhimin e aditivëve në Universitetin Brunel. Ai thotë se ato mund të përdoren për restaurim historik: “jo për të printuar një shtëpi, por për të printuar pjesë dekorative ose për të restauruar disa pjesë”.
Ato mund të jenë tepër të dobishme pas fatkeqësive natyrore për të prodhuar pjesë të ndërtesave të dëmtuara. Universiteti Maine thotë se shpreson që printeri të mund të përdoret për të prodhuar banesa me çmim të përballueshëm, apo dhe ura, varka dhe turbina me erë.
Ky printer mund të printojë deri në 227 kg material në orë. Ndërsa printerët 3D shpesh printojnë duke përdorur plastikë, universiteti shpreson të përfshijë materiale më të qëndrueshme dhe t’u japë përparësi polimerëve të ricikluar. Maine ka gjithashtu si qëllim që në të ardhmen të arrijë të shfrytëzojë mbetjet drusore pas përpunimeve si një material që mund të shfrytëzohet nga printeri.
“E keqja është se ato lloj materialesh nuk janë aq të qëndrueshme,” thotë Dr Pei. Druri “nuk është aq i fortë, por është më miqësor ndaj mjedisit“, thotë ai.
