Dhe pse gjatë kohëve të fundit kemi parë shumë këngëtarë të revoltuar nga inteligjenca artificiale e cila përdor zërin e tyre për të krijuar këngë të reja, duket se për Paul McCartney kjo gjë nuk përbën një problem.
Në fakt, në një interviste për programin Today Programme të BBC Radio 4, mjeshtri 80 vjeçar zbuloi se kënga e fundit e Beatles është krijuar falë ndihmës së AI dhe se kjo këngë do të publikohet më vonë gjatë këtij viti.
Për sa i përket këngës, McCartney tha: “Ishte një demo për të cilën unë dhe John kishim punuar më parë, dhe tashmë sapo e kemi përfunduar… Ne ishim në gjendje të merrnim zërin e John dhe ta perfeksiononim përmes AI në mënyrë që më pas ta miksojmë regjistrimin siç bëjmë zakonisht.”
Dhe pse ai nuk tregoi titullin e kësaj kënge, mendohet se do të jetë një kompozim i vitit 1978 nga John Lennon i quajtur Now And Then.
McCartney përmendi gjithashtu dhe periudhën gjatë krijimit të dokumentarit “The Beatles: Get Back” se si regjizori Peter Jackson arriti të qartësonte zërin e John Lennon përmes inteligjencës artificiale.
“Ai ishte në gjendje të ndante zërin e John nga një regjistrim i vjetër, ku dëgjohej John duke kënduar dhe një piano. Ata i treguan AI se cili ishte zëri i John dhe cila ishte zhurma e pianos, dhe më pas AI arriti të hiqte pianon nga regjistrimi, duke ruajtur vetëm zërin e tij.”
