OpenAI ka njoftuar ndërtimin e Stargate Norway, qendrën e saj të parë të të dhënave për inteligjencën artificiale në Evropë, në bashkëpunim me Nscale (ofrues britanik i infrastrukturës cloud për AI) dhe Aker (kompani norvegjeze e infrastrukturës energjetike). Projekti do të zhvillohet si një bashkëpunim 50/50 mes Nscale dhe Aker, ndërsa OpenAI do të blejë kapacitet nga qendra.
Njoftimi vjen në një kohë kur Evropa po përshpejton përpjekjet për sovranitetin e AI dhe investimin në qendra të dhënash. BE-ja ka shpallur investime shumë miliardëshe, përfshirë 10 miliardë euro për 13 “fabrika AI” dhe një financim fillestar prej 20 miliardë euro. Megjithatë, Stargate Norway nuk është pjesë e këtij plani të BE-së. Qendra synon të “shfrytëzojë kapacitetin sovran të llogaritjes” në Evropë, duke u dhënë përparësi startup-eve dhe kërkuesve shkencorë norvegjezë.
Faza e parë 20 MW do të financohet me rreth 1 miliard dollarë secila nga Nscale dhe Aker. Kapaciteti fillestar do të jetë 230 MW, me zgjerim në 290 MW deri në fund të 2026, duke përdorur 100,000 GPU Nvidia. Qendra do të ngrihet pranë Narvik, në veri të Norvegjisë, për të përfituar nga energjia hidrike, klima e ftohtë dhe baza industriale e zhvilluar. Ajo do të funksionojë plotësisht me energji të rinovueshme, me sistem ftohjeje me qark të mbyllur “direct-to-chip” për efikasitet maksimal, ndërsa nxehtësia e tepërt do të përdoret për biznese me karbon të ulët.
Në përputhje me Aktin e AI të BE-së dhe Direktivën për Efiçiencën e Energjisë, qendra do të respektojë standardet për mbrojtjen e mjedisit, transparencën e konsumit të energjisë dhe rikuperimin e nxehtësisë. Projekti vjen pas planeve të OpenAI për të investuar 500 miliardë dollarë në 10 gigavat infrastrukturë AI në SHBA dhe zgjerimit të saj me Stargate UAE dhe marrëveshjen me qeverinë britanike për avancimin e AI-së.
