Samsung është gjithmonë i gatshëm të eksperimentojë me koncepte të guximshme të reja të smartphone-ve dhe eventi MWC i këtij viti, ku Geek Room dhe Neptun janë të pranishëm për të informuar ndjekësit rreth inovacioneve më të reja teknologjike, nuk përbën përjashtim.
Produkti i cili tërhoqi vëmendjen më të madhe ishte “Cling Band“, një koncept fleksibël i smartphone-ve që shndërrohet në një orë inteligjente.
Koncepti “Cling Band” i Samsung Display është një pajisje unike me një ekran fleksibël OLED që mund të shërbejë njëkohësisht si një smartphone dhe një orë inteligjente. Në modalitetin e tij normal, ne shikojmë dizajnin e një smartphone-i tipik, me korniza shumë të holla. Por ajo që e bën vërtet interesant këtë koncept është përkulshmëria e ekranit.
Cling Band mer formën e shkronjës “C”, duke u shndërruar në një monitorues të rrahjeve të zemrës. Kur mbahet në dorë, pajisja mund të gjurmojë shëndetin tuaj si një orë inteligjente e dedikuar. Ndërsa ky koncept është ende në fazat e tij të hershme, ai nxjerr në pah potencialin e jashtëzakonshëm të teknologjisë së ekranit të përkulshëm të Samsung.
Samsung nuk është i vetmi që eksploron konceptet e telefonave që shndërrohen në ora inteligjente. Motorola prezantoi gjithashtu një koncept të ngjashëm në MWC, duke demonstruar një rritje të interesit drejt këtyre pajisjeve.
Megjithatë, mbetet për t’u parë nëse një produkt i tillë do të nxirret në treg nga kompanitë përkatëse.
