ChatGPT është aktualisht një ndër temat kryesore të diskutimit të njerëzve në internet. Aplikimet e kësaj inteligjence artificiale janë shumë të gjëra pasi ChatGPT mund të përdoret për t’iu përgjigur pyetjeve, për të shkruar raporte si dhe për të formuluar kode për software.
Raportimet e fundit tregojnë se Microsoft kërkon të investojë në OpenAi, kompaninë mëmë të ChatGPT. Gjigandi i industrisë së teknologjisë është i gatshëm të paguajë deri në $10 miliardë.
Sigurisht që Microsoft e ka një plan për të përfituar mbrapsht këtë shumë të madhe. Mendohet se Microsoft ka propozuar një marrëveshje ku pas investimit do të marrë 75% të fitimeve të OpenAI deri sa të ketë rikuperuar shumën e investuar.
JUST IN: Microsoft $MSFT in talks to acquire a 49% stake worth $10 billion in ChatGPT owner OpenAI.
— Watcher.Guru (@WatcherGuru) January 10, 2023
Më pas, do të krijohet një strukturë e re drejtuese në Open AI. Microsoft do të ketë 49% të aksioneve në këtë kompani, ndërkohë që investitorët e tjerë do të marrin 49% të tjera. 2% i mbetur do t’i shkojë kompanisë mëmë jo-fitimprurëse të OpenAI.
Aktualisht OpenAi ka një vlerësim prej $29 miliardë në treg. Deri në vitin 2024 ChatGPT parashikon se do të ketë mbledhur $1 miliardë fitime. Prandaj kjo marrëveshje mund të rezultojë shumë e suksesshme për Microsoft, duke konsideruar se së shpejti dhe Google mund të përfshihet në këtë treg. Gjithashtu kërkesa e lartë për AI mund të udhëzojë Microsoft drejt një tjetër periudhe të artë.
