Gjatë kohëve të fundit ne pamë se si Meta hoqi dorë nga kriptomonedha Diem, mirëpo kompania po vazhdon të eksplorojë produktet e financës, sipas një raportimi të ri nga Financial Times. Gjetja më e fundit nga Meta është monedha virtuale e cila mund të quhet “Zuck Bucks”.
Zuck Bucks, që e kanë marrë emrin nga CEO i kompanisë, Mark Zuckerberg, me shumë mundësi nuk do të jetë një kriptomonedhë. Meta do ta prezantojë këtë monedhë virtuale si in-app tokens që do të kontrollohen nga kompania, në mënyrë të ngjashme me ato që përdoren në lojra të ndryshme si Roblox.
Kompania nuk e ka distancuar veten nga produktet e blockchain, pasi ato po përgatisin postimin dhe shpërndarjen e NFTs në Facebook. Ky shërbim pritet të vijë gjatë mesit të muajit maj.
Gjithashtu Meta po eksploron dhe zhvillimin e “social tokens” apo “reputation tokens” të cilat mund të ofrohen si një shpërblim për kontributet e bëra në grupet e Facebook. Kur zëdhënësja e Meta Lauren Dickson u pyet në lidhje me monedhën virtuale, ajo tregoi se nuk kishte asnjë zhvillim për të shpërndarë me publikun.
Do të na duhet të presim dhe të shikojmë se si Zuck Bucks apo projekte të tjera të kompanisë do të kontribuojnë në daljen e saj nga një situatë tepër e vështirë.
