Ministri i Punëve të Brendshme, Blendi Çuçi, ka prezantuar makinën e re inteligjente e cila do të konstatojë të gjitha shkeljet kryera në një aks rrugor të cakutuar, që nga tejkalimi i shpjetësisë së lejuar e deri tek mosvënia e rripit të sigurimit dhe përdorimi i telefonit gjatë drejtimit. Sapo të konstatohet një shkelje, kjo makinë fotografon targën e mjetit dhe informacionin e grumbulluar e dërgon në kohë reale për përpunim në Drejtorinë e Policisë Rrugore.
Makina inteligjente është një pajisje që përdor teknologjinë më të re dhe mund të regjistrojë shkeljet që ndodhin në një segment rrugor me 4-6 korsi. Kjo gjë duket se ka qenë e papritur nga drejtuesit e automjeteve, pasi vetëm ditën e parë janë regjistruar 305 shkelje.
“Kjo është një mënyrë krejtësisht automatike dhe gjoba do të vijë në bazë të regjistrimit të targës, që bëhet nga aparatura, me foto dhe me video, do t’ju vijë në shtëpi, aty ku keni deklaruar dhe adresën, ku keni regjistruar mjetin tuaj. Tashmë nuk ka më mik! Është vetëm kjo aparaturë, punon ditën dhe natën, 24 orë,” u shpreh Ministri Bledi Çuçi.
Nga ana tjetër Drejtori i Përgjithshëm i Policisë së Shtetit, Ardi Veliu, tha se gjoba iu dërgohet shoferëve kundravajtës brenda 30 ditëve nga konstatimi përmes Postës Shqiptare.
Geek Room i bën thirrje të gjithë drejtuesve të mjeteve të respektojnë rregullat e qarkullimit rrugor, pasi një pakujdesi e çastit mund të sjellë dëme shumë të mëdha.
