Telly është një startup teknologjik i cili po shpërndan falas 500,000 TV Smart 4K, madje ka në plan që të zgjerojë këtë promovim deri në miliona TV. Mirëpo ku qëndron përfitimi i Telly në këtë plan?
Problemi është se çdo televizor Telly do të ketë poshtë ekranit një tjetër ekran shtesë ku do të shfaqen reklama, së bashku me informacione të tjera në lidhje me parashikimin e motit apo rezultatet e ndeshjeve të futbollit. Gjithashtu mbi televizor është e pranishme një kamera, që Telly thotë se mund të përdoret për të kryer video-telefonata në Zoom.
Themeluesi dhe CEO i Telly, Ilyz Pozin, tregoi në një deklaratë për shtyp se “Telly është inovacioni më i madh në TV që nga koha e shpikjes së TV me ngjyra.” Zakonisht njerëzit duhet të paguajnë për të blerë një TV, si dhe të paguajnë për përmbajtjen që shikojnë në këtë TV, mirëpo tashmë Telly do të ofrojë hardware-in falas.
Zëvëndësimi i kostos së hardware me reklama nuk është një teori e re, pasi e kemi parë një gjë të tillë dhe tek tabletët Fire të Amazon, por këto tablet asnjëherë nuk janë ofruar falas. Do të na duhet të presim dhe të shikojmë se si gjërat do të shkojnë për Telly, pasi këto TV mund të jenë dhe një cënim i privatësisë tuaj në shtëpi falë pajisjes me kamera dhe mikrofonë.
