Një startup i quajtur Albedo Space ka nisur prodhimin e satelitëve që do të lançohen në orbitën e ulët dhe do të jenë në gjendje të ofrojnë pamje të zmadhuara të individëve specifikë në Tokë, siç raporton The New York Times.
Bashkëthemeluesit e sipërmarrjes thonë se satelitët nuk do të pajisen me teknologjinë e njohjes së fytyrës për identifikim, por ata do të jenë në gjendje të ofrojnë imazhe të zmadhuara të njerëzve – një hap masiv përpara në survejimin e bazuar në satelitë që mund të rrezikojë privatësinë tonë. Me sa duket kjo teknologji është gati të përdoret nga organet qeveritare të mbrojtjes të SHBA, të cilat kanë bërë të mundur dhe grumbullimin e $100 milion përmes kontratave të firmosura.
“Kjo është një kamerë gjigante në qiell për çdo qeveri që mund ta përdorë në çdo kohë pa dijeninë tonë“, tha Jennifer Lynch, këshilltare e përgjithshme e Electronic Frontier Foundation. “Ne patjetër duhet të shqetësohemi.”
Siç vë në dukje NYT, themeluesit e Albedo i kanë kushtuar vëmendje shqetësimeve të privatësisë prej disa kohësh. Në një postim në shkurt 2021 në forumin Hacker News, për shembull, bashkë-themeluesi dhe CEO i Albedo, Topher Haddad, i tha një përdoruesi të shqetësuar të rrjetit se “ne jemi plotësisht të vetëdijshëm për implikimet e privatësisë dhe potencialin për abuzim/keqpërdorim“.
Megjithatë Albedo tregon se ky satelit mund të jetë shumë i rëndësishëm “në shpëtimin e jetëve!“, duke theksuar se satelitët e tij mund të përdoren për qëllime si për të ndihmuar autoritetet në raste të fatkeqësive natyrore.
“Kjo teknologji po na çon më afër një bote që të mbikëqyr 24/7 si Big Brother,” tha astrofizikani i Harvardit, Jonathan McDowell.
