Shkencëtarët zviceranë kanë arritur të zhvillojnë një pajisje që fuqizohet nga sheqeri për të prodhuar automatikisht sasinë e nevojshme të insulinës, në rastet kur niveli i sheqerit në gjak është majft i lartë. Kjo gjë mund të lehtësojë situatën shëndetësore të miliona personave që vuajnë nga diabeti.
Aktualisht të gjithë personat me diabet duhet të shmangin rritjen e nivelit të sheqerit në gjak në nivele shumë të larta duke injektuar vazhdimisht insulinë, gjë e cila nuk është shumë praktike dhe disi e dhimbshme. Sigurisht që ato duhet të masin dhe nivelin e sheqerit në gjak duke shpuar gishtin dhe duke përdorur një aparat të caktuar.
Megjithatë ka shumë shpresë se sistemi i ri i zhvilluar nga shkencëtarët zviceranë do t’i japë fund metodave aktuale të menaxhimit të diabetit. Sistemi përbëhet nga 2 pjesë: nga një qelizë e veshur me një polimer të marrë nga algat si dhe kapsula e mbushur me qeliza beta artificiale.
Kur implantohet në lëkurë, në qelizën e veshur me një polimer të algave futet sheqeri, ku nanogrimcat bëjnë të mundur ndarjen e tij në acid glukonik dhe një proton. Protoni aktivizon qarkun elektrik, duke aktivizuar kështu kapsulën e mbushur me qeliza beta artificiale, të cilat nxisin prodhimin dhe sekretimin e insulinës.
Kur ky sistem u testua tek minjtë me diabet tip 1, veproi pikërisht siç ishte planifikuar duke mbajtur të qëndrueshëm nivelin e sheqerit në gjak. Shkencëtarët tregojnë se ky sistem mund të prodhojë energji mjaftueshëm sa për t’u lidhur me një smartphone, duke e bërë monitorimin shumë më të lehtë.
