Ndërsa shkon me pushime në Theth apo në ndonjë park natyror, një gjë të bën përshtypje më shumë nga gjithçka tjetër; mungesa e zhurmave.
Ditë apo natë, përpiqesh të flesh, por qyteti nuk i respekton shumë oraret e tua, ndaj makinat do qarkullojnë, ambulanca, punimet e bashkisë, lokali shisha ngjitur me pallatin ku shqiptari i 2020 shkon të pijë kafe me Martin Garrix me volum në maksimum.
Dritarja mund të izolojë deri diku nëse mbyllet, por ventilimi natyral është i domosdoshëm.
Meqë Thethin nuk e jetojmë përditë, teknologjia përpiqet të përmirësojë edhe ato aspekte të jetës të cilat nuk e kishim menduar ndonjëherë se mundemi.
Alternativa fshihet pas formulës së kufjeve “noise-cancelling” , dhe jo nuk është e thënë të flemë me kufje në vesh, kërkues në Singapor kanë krijuar një sistem fillestar i cili me tu vënë tek dritarja mund të ulë zhurmat që vijnë nga jashtë me të paktën 10 decibel.
Sistemi u krijua nga një skuadër shkencëtarësh nga Singapori dhe Nanyang Technological University.
24 bokse të vegjël të cilët prodhojnë valë zanore që korrespondojnë me zhurmën hyrëse dhe e neutralizojnë atë.
Si çdo tingull mënyra më e mirë për ta neutralizuar është që në burim, ndaj sistemi njeh dritaren si të tillë.
Një mikrofon i vendosur jashtë pikas valët zanore përsëritëse të burimit të padëshiruar, kompiuteri deshifron frekuencën e valës së nevojshme për ta neutralizuar atë tingull çka i transmetohet speakerave brenda në dhomë të cilët më pas do të prodhojnë kundra valët dhe kaq duhet.
Për fat të keq sistemi funksionon më mirë me burime tingujsh të qëndrueshëm dhe të lartë, si hapja e kanaleve për të futur kabujt e kompanisë më të fundit të internetit në qytet, apo muzikën e vazhdueshme të të njejtit lokal që tani ka ndërruar këngën por jo volumin.
Tinguj spontan, si një borie makine, fishekzjarre, apo të bërtiturat janë të vështira për tu ndaluar.
Por sidoqoftë, është vetëm alternativa e parë, teksa pamë shpejtësinë me të cilën kufjet dhe opsionet “noise cancelling” avancuan mund të themi që edhe ky sistem së shpejti do na lejojë të flemë freskët, qetë dhe pa u bërë pjesë e debatit të komshijve.
