Google ka vendosur të shkatërrojë miliarda të dhëna kërkimi në web të grumbulluara kur përdoruesit po përdornin “modalitetin Incognito“, sipas një marrëveshjeje të propozuar të paraqitur të hënën ndaj padisë së ngritur.
Zgjidhja e propozuar kundër Google do të detyrojë gjithashtu kompaninë të bëjë më të qartë mënyrën se si mbledh informacione në modalitetin incognito dhe të vendosë kufizime në mbledhjen e të dhënave në të ardhmen.
Padia e vitit 2020 u ngrit nga mbajtësit e llogarive të Google, të cilët akuzuan kompaninë për ndjekjen e paligjshme të sjelljes së tyre në internet përmes funksionit të modalitetit incognito. Tashmë sipas marrëveshjes, Google do të duhet të adresojë të dhënat e mbledhura në këtë modalitet në 2023 dhe më herët, dhe të gjitha të dhënat që nuk fshihen plotësisht duhet të çidentifikohen.
“Kjo marrëveshje siguron llogaridhënie dhe transparencë reale nga mbledhësi më i madh i të dhënave në botë dhe shënon një hap të rëndësishëm drejt përmirësimit dhe mbrojtjes së të drejtës sonë për privatësi në internet,” shkruajnë paditësit në dosjen e propozuar të zgjidhjes. Zëdhënësi i Google, José Castañeda, tha në një deklaratë se kompania është “e kënaqur të zgjidhë këtë padi, për të cilën ne gjithmonë kemi besuar se ishte e pabazë“.
Megjithëse paditësit vlerësuan zgjidhjen e propozuar me dëmshpërblimin e $5 miliardë drejt përdoruesve, Castañeda tha se kjo gjë nuk do të ndodhë.
“Ne kurrë nuk i lidhim të dhënat me përdoruesit kur ata përdorin modalitetin ‘Incognito’,“, shtoi Castañeda. “Ne jemi të lumtur të fshijmë të dhënat e vjetra teknike që nuk janë lidhur kurrë me një individ dhe nuk janë përdorur kurrë për asnjë formë personalizimi.”
Google ra gjithashtu dakord që për pesë vjet t’i lejojë përdoruesit të bllokojnë cookies të palëve të treta automatikisht në modalitetin “Incognito” për të penguar ndjekjen e përdoruesve nga Google ndërsa ata janë në këtë modalitet. Individët ende mund të paraqesin kërkesa për dëmshpërblim në gjykatën e shtetit të Kalifornisë, sipas kushteve të zgjidhjes. Tashmë janë paraqitur 50 kërkesa.
