Google ka prezantuar Nano Banana Pro, versionin e përmirësuar të modelit të tij të gjenerimit të imazheve, duke sjellë saktësi më të madhe në tekst, rezolucione më të larta, aftësi të reja editimi dhe madje kërkim në web. Modeli është ndërtuar mbi Gemini 3 dhe shënon një hap të madh përpara krahasuar me Nano Banana, duke lejuar krijimin e imazheve më të detajuara dhe tekst më të qartë në stile, fonte dhe gjuhë të ndryshme.
Nano Banana Pro u ofron përdoruesve profesionalë kontroll të zgjeruar mbi elementët vizualë, si këndet e kamerës, ndriçimi i skenës, thellësia e fushës, fokusi dhe ngjyrimi. Një tjetër përmirësim i rëndësishëm është rritja e rezolucionit: nga kufiri 1024 x 1024 px i modelit origjinal, Pro gjeneron imazhe 2K dhe 4K. Megjithatë, kjo cilësi shtesë vjen me kosto më të lartë, $0.139 për imazhe 1080p ose 2K dhe $0.24 për 4K, krahasuar me $0.039 për imazhet standarde të modelit të mëparshëm.
Modeli mund të përdorë 6 “high-fidelity shots” dhe të kombinojë deri në 14 objekte në një imazh, si dhe të ruajë ngjashmërinë e deri pesë personave, gjë që e bën të dobishëm për skena komplekse dhe projekte kreative. Google ka publikuar edhe një aplikacion demo për të testuar këto aftësi.
Nano Banana Pro po integrohet gradualisht në mjetet ekzistuese të Google. Aplikacioni Gemini do ta përdorë modelin si standard, megjithëse përdoruesit falas do të kenë kufizime të caktuara. Abonentët Plus, Pro dhe Ultra do të kenë kufizime më të larta përdorimi dhe qasje në NotebookLM, ndërsa për kërkim në web funksioni do të jetë i disponueshëm për përdoruesit Pro dhe Ultra të AI Mode. Modeli gjithashtu është integruar në Flow për gjenerim videosh, si dhe në Google Slides dhe Vids për Workspace.
Për zhvilluesit, Nano Banana Pro mund të aksesohet përmes Gemini API, Google AI Studio dhe IDE së re Antigravity. Google ka integruar edhe SynthID për identifikimin e imazheve të krijuara ose modifikuara nga AI direkt brenda aplikacionit Gemini.
