Google dëshiron që ju ta keni më të thjeshtë të shikoni se si një veshje e reklamuar në internet do të duket në trupin tuaj para se ju të bëni një blerje.
Për këtë arsye, kompania prezantoi ditën e mërkurë një shërbim të ri “try-on” që përdor inteligjencën artificiale gjeneruese për të treguar veshjet e përzgjedhura nga ju në një grup të gjërë modelesh ku shfaqen tipe të ndryshme trupash.
Google po lançon gjithashtu një shërbim të veçantë që i ndihmon përdoruesit të gjejnë veshje të ngjashme por me ngjyra, modele ose stile të ndryshme, nga tregtarë të tjerë në të gjithë ëeb-in, duke përdorur një algoritëm të përputhjes vizuale të mundësuar nga AI.
Këto përpjekje nga ana e Google janë pjesë e qëllimit përfundimtar të kompanisë për të fuqizuar Bard AI dhe për ta shndërruar atë në një konkurent të denjë të ChatGPT. Gjatë konferencës Google I/O të muajit të kaluar, Google shpenzoi më tepër se 90 minuta duke prezantuar të gjitha avancimet e reja në AI.
Google shtoi se shërbimi i provimit virtual të veshjeve u zhvillua duke përdorur shumë çifte imazhesh të më shumë se 80 modeleve që qëndrojnë përballë dhe në profil, nga madhësia XS në XL, dhe me ngjyra të ndryshme të lëkurës, forma trupore dhe prejardhje etnike. Mjeti i fuqizuar nga AI më pas mësoi të përputhej me formën e disa këmishave në ato pozicione për të gjeneruar imazhe reale të personit nga të gjitha këndet.
