Tirana do të kthehet në kryeqendrën e teknologjisë dhe inovacionit më 2 dhe 3 tetor, kur në Pallatin e Kongreseve do të zhvillohet edicioni i tretë i panairit ndërkombëtar Future2Tech 2025, ku Geek Room do të jetë një partner mediatik. Ky aktivitet synon të bashkojë liderë të industrisë, startup-e, investitorë dhe institucione arsimore për të diskutuar dhe prezantuar risitë që po formësojnë të ardhmen.
Me mbi 100 ekspozues dhe më shumë se 5,000 vizitorë të pritshëm, eventi premton dy ditë të mbushura me prezantime, demonstrime dhe mundësi bashkëpunimi. Pjesëmarrësit do të kenë mundësinë të njihen me zgjidhje të fundit në fusha si inteligjenca artificiale, robotika, fintech, siguria kibernetike dhe arsimi digjital, ndërsa startup-et do të prezantojnë projektet e tyre në një hapësirë të dedikuar për investitorët.
Një nga pikat më tërheqëse të panairit janë zonat interaktive, ku vizitorët mund të provojnë prototipa dhe aplikime praktike të teknologjive më të reja. Krahas ekspozitës, do të zhvillohen mbi 15 panele dhe konferenca me ekspertë ndërkombëtarë dhe vendas, të cilët do të diskutojnë sfidat dhe trendet që po udhëheqin transformimin digjital.
Future2Tech shërben si një urë lidhëse mes sektorit privat, institucioneve arsimore dhe politikëbërësve, duke nxitur bashkëpunimin dhe shkëmbimin e ideve. Për startup-et shqiptare dhe rajonale, ky është një shans i çmuar për të fituar vëmendjen e investitorëve dhe për të hyrë në tregje më të gjera.
Përveç programit zyrtar, organizatorët kanë planifikuar edhe aktivitete sociale që synojnë të lehtësojnë njohjet profesionale dhe të krijojnë një atmosferë dinamike për pjesëmarrësit.
Me fokus në teknologjinë, inovacionin dhe edukimin, Future2Tech 2025 konfirmon rolin e Shqipërisë si një qendër gjithnjë e më të rëndësishme për zhvillimet digjitale në rajon.
