Siç raportohet nga Le Monde, Franca ka miratuar një projektligji tepër kontrovers, i cili i lejon policisë akses të papenguar në vendndodhjen e qytetarëve të saj. Për më tepër, policia mund të aktivizojë kamerat dhe mikrofonat për të marrë regjistrime video dhe audio të të dyshuarve.
Projektligji thuhet se do të zbatohet vetëm për të dyshuarit për krime që dënohen me të paktën pesë vjet burg dhe Ministri i Drejtësisë Eric Dupond-Moretti pohoi se dispozita e re do të prekë “vetëm disa dhjetëra raste në vit”. Gjatë një debati mbi projektligjin dje, politikanët francezë shtuan një amendament që urdhëron miratimin e gjyqtarit për çdo përgjim të kryer nën objektin e projektligjit dhe kufizon kohëzgjatjen e mbikëqyrjes në gjashtë muaj, sipas Le Monde.
“Për krimin e organizuar, policia mund të ketë akses në zërin dhe imazhin e një pajisjeje. Kjo ka të bëjë me çdo pajisje të lidhur: telefonin, mikrofonin e altoparlantëve, kamerën kompjuterike, sistemin kompjuterik të një makine… të gjitha pa dijeninë e personave të interesuar”, tha grupi francez i avokatisë La Quadrature du Net në një deklaratë në Twitter muajin e kaluar.
“Për sa kohë pajisjet dixhitale po përdoren gjithnjë e më tepër në jetën tonë, pranimi i vetë parimit që ato shndërrohen në një objekt ndihmues për policinë pa bërë me dije përdoruesit, përbën një problem serioz në shoqëritë tona.” Projektligji vjen pas një kohe kur qeveria franceze zgjeroi më parë autoritetin policor nëpërmjet teknologjisë. Në vitin 2021, New York Times raportoi se Parlamenti francez miratoi një projektligj që do të zgjeronte aftësinë e policisë franceze për të monitoruar civilët duke përdorur drone. Presidenti francez Emmanuel Macron argumentoi në atë kohë se projektligji kishte për qëllim të mbronte oficerët e policisë nga protestuesit gjithnjë e më të dhunshëm.
Në fund të muajit të kaluar, protestat filluan në Francë pas vrasjes e adoleshentit Nahel Merzouk, i cili u qëllua nga një oficer policie. Protestat kanë përfshirë vendin, me demonstruesit që shpesh përleshen me policinë. Miratimi i projektligjit vjen teksa këto protesta janë ndezur prej afro dy javësh. Macron gjithashtu kërcënoi se do të mbyllte platformat e mediave sociale, pasi ai pretendon se protestuesit po filmojnë, postojnë dhe organizohen në aplikacione si TikTok, Snapchat dhe Telegram.
