Vitin e kaluar, Bashkimi Evropian miratoi legjislacionin e ri që do të detyrojë shumë pajisje elektronike, duke përfshirë këtu dhe iPhone-t, që të pajisen me një portë karikimi USB-C, pasi në të kundërt nuk do të mund të shesin produktet e tyre në këtë zonë. Apple ka kohë deri në datën 28 dhjetor 2024 që t’i bindet këtij ligji, dhe pse pritet që gjenerata e ardhshme e iPhone-ve të pajiset me portën e karikimit USB-C.
Sigurisht, Apple po planifikonte që të limitonte shpejtësinë e karikimit në rastet kur nuk përdoreshin kabllo të çertifikuara nga programi “Made for iPhone”. Verifikimi i kabllove të paçertifikuar bëhet mjaft lehtësisht falë çipit që Apple vendos në këto kabllo karikimi, të cilat njihen më pas nga pajisja.
Sapo mori vesh për këto raportime, komisioneri Thierry Breton i ka dërguar Apple një letër ku paralajmëron se limitimi i funksionalitetit të kabllove USB-C nuk do të lejohet nga Bashkimi Evropian, dhe në rast shkeljeje do të ndalohet shitja e iPhone-ve në këtë kontinent.
Për sa kohë Apple ka afat deri në dhjetor të vitit 2024 për t’iu përshtatur ligjeve të vendosura nga BE, ekziston mundësia që kompania të provojë një taktikë të tillë për të gjithë iPhone-t e serisë 15.
