Apple mund të lançojë modele të reja për kasën e karikimit të AirPods që do të ishte pothuajse e pamundur të humbë. Gjigantit të teknologjisë iu aprovua një patentë e re të hënën duke e përshkruar kasën si një byzylyk rreth kyçit të dorës ose një unazë me zinxhir çelësash.
Dokumenti tregon imazhe të një kase fleksibël në formë U, në të cilën përdoruesit vendosin AirPods në secilën anë dhe mbyllin pajisjen. Apple tha se arsyetimi për këtë ridizenjim është se “disa aktivitete nuk përfshijnë përdorimin e xhepave ose kuletave për të ruajtur një pajisje elektronike“, si për shembull kur ju stërviteni.
Pjesa e brendshme e kutisë do të jetë e përkulshme, por në patentë nuk tregohen materialet që do të përdoren në këtë rast. Njëra gjysma do të përfshijë një bateri fleksibël dhe tjetra një spirale induksioni, e cila do të bëjë të mundur karikimin e kufjeve wireless. Dhe ndryshe nga kutia aktuale e karikimit AirPods, kontrollet e volumit do të vendosen në pjesën e jashtme dhe do të operohen me një rrëshqitje të gishtit. Ky do të ishte i vetmi seksion që nuk është fleksibël – patenta e përshkruan atë si një zonë ‘të ngurtë’. Patenta sugjeron gjithashtu vendosjen e magneteve në çdo skaj për të siguruar mbylljen në një rreth.
Apple më pas tregoi pjesën më të mirë të dizajnit të ri: kasa mund të mbahet si byzylyk ose zinxhir çelësash. Një byzylyk është shembulli i parë i treguar në patentë, duke sugjeruar që kufjet wireless të vendosen brenda çdo skaji dhe përdoruesi kap pajisjen në formë U për të formuar një rreth. Dhe për shkak se pajisja mbyllet, ajo mund të përdoret gjithashtu për të mbajtur çelësat.
