Studiuesit kanë zbuluar provat e para arkeologjike se përbërësit psikoaktive të kanabisit mund të qëndrojnë në kockat tona shumë kohë pasi të kemi vdekur. Kjo gjë u vërtetua nga mbetjet skeletore të njerëzve të shekullit të 17-të.
Autorët e një studimi të ri fillimisht po kërkonin shenja të administrimit të bimëve mjekësore dhe “rekreative” në popullatën e shekullit të 17-të në Milano, Itali. Ata e përqendruan vëmendjen e tyre në mbetjet në Ospedale Maggiore, një nga spitalet më inovative në Evropë në atë kohë, që datonin midis 1638 dhe 1697. Ato mbetën të ruajtura aty deri në momentin e studimit, gjë që i bëri të përsosura për këtë analizim.
Në fakt, një studim i mëparshëm i kryer nga ekipi gjeti prova të opiumit në mostrat e kockave kraniale dhe indet e ruajtura mirë të trurit. Ishte kjo dëshmi që frymëzoi këtë studim të fundit. “Prandaj, ne vendosëm të zgjerojmë kërkimin në kockat e gjata me një studim pilot mbi femurin”, shkruan autorët. “Kështu u mblodhën mostrat e kockave të kofshës nga mbetjet njerëzore me qëllimin për të kërkuar, nëpërmjet hetimeve arkeotoksikologjike, praninë e substancave që mund të shoqërohen me administrimin ose marrjen e bimëve mjekësore ose rekreative brenda popullatës.”
Këtë herë, Gaia Giordano në Universitetin e Milanos, autorja e parë e studimit së bashku me kolegët nxorën mostra kockash nga eshtrat e nëntë njerëzve të varrosur në Ca’ Granda. Më pas ata kryen analiza toksikologjike duke pluhurosur kockën dhe më pas duke përgatitur mostrat në mënyrë që përbërësit kimikë individualë të mund të ndaheshin dhe pastroheshin.
Analiza zbuloi molekula të tetrahidrokanabinolit (THC) dhe kanabidiolit (CBD) – komponimet psikoaktive të kanabisit. Këto molekula u gjetën në kockat e kofshëve të një burri dhe një gruaje. “Rezultatet e marra në mostrat e kockave treguan praninë e dy molekulave, [THC] dhe CBD, duke theksuar administrimin e kanabisit”, shpjegoi ekipi. “Këto rezultate, sipas njohurive tona, përbëjnë raportin e parë mbi zbulimin e kanabisit në mbetjet njerëzore historike dhe arkeologjike.”
