Asgjë nuk krahasohet me pushimin që ne bëjmë gjatë fundjavës në shtëpi pas një jave të lodhshme plot aktivitete. Tani, ekspertët kanë zbuluar një arsye tjetër pse duhet të qëndroni në shtrat në fundjavë – pasi njerëzit që përpiqen të rikuperojnë orët e humbura të gjumit kanë më pak gjasa të përjetojnë simptoma të depresionit.
Studiuesit nga Central South University në Kinë analizuan të dhënat për gati 8000 njerëz që iu përgjigjën një pyetësori për gjumin e tyre, dhe vlerësuan simptomat e depresionit. Ata zbuluan se gati gjysma e njerëzve flinin më tepër në fundjavë për të rikuperuar orët e humbura të gjumit. Në përgjithësi, njerëzit që flinin një ose dy orë më shumë në fundjavë kishin deri në 46% më pak gjasa të shfaqnin shenja të simptomave depresive, zbuluan ata.
Analiza e mëtejshme zbuloi se përfitimet e gjumit të fundjavës për simptomat e depresionit ishin kryesisht të pranishme te njerëzit që flinin gjashtë orë ose më pak gjatë ditëve të javës. Lidhja gjithashtu dukej të ishte më e fortë tek meshkujt dhe ata nën moshën 65 vjeç.
Duke shkruar në “Journal of Affective Disorders“, ekipi tha: “Depresioni është çrregullimi mendor më i zakonshëm, me rreth 280 milionë njerëz në mbarë botën që vuajnë nga ai. Ne synuam të hetojmë lidhjen midis gjumit të fundjavës dhe simptomave të depresionit tek të rriturit.“ Në përfundimin e tyre, ata shkruan: “Fjetja gjatë fundjavës 0-2 orë lidhej me zvogëlimin e gjasave për simptoma depresive. Gjetjet tona mund të ofrojnë prova shtesë epidemiologjike për efektet e gjumit në simptomat e depresionit.”
Pavarësisht gjetjeve, studimet e mëparshme kanë treguar se fjetja në fundjavë mund të rrisë rrezikun e diabetit, sëmundjeve të zemrës dhe obezitetit. Studimet kanë zbuluar se mospërputhjet e vogla në modelet e gjumit – për shembull të flesh në fundjavë prej vetëm 90 minutash – mund të bëjnë një ndryshim të rëndësishëm në shëndetin e zorrëve.
