Disa muaj pas marrjes së miratimit nga FDA për kryerjen e testimeve mbi njerëzit, Neuralink është duke kërkuar për subjektet e saj të parë të testimit. Prova fillestare gjashtëvjeçare, të cilën kompania në pronësi të Elon Musk po e quan “Studimi PRIME“, ka për qëllim të testojë teknologjinë Neuralink të krijuar për të ndihmuar personat e paralizuar të kontrollojnë pajisje teknologjike.
Kompania është në kërkim të personave me tetraplegji për shkak të dëmtimit vertikal të shtyllës kurrizore ose nga skleroza amiotrofike laterale (ALS), të cilët janë mbi moshën 22 vjeç dhe kanë një “kujdestar të qëndrueshëm dhe të besueshëm” për të qenë pjesë e studimit.
Studimi PRIME (Precise Robotically Implanted Brain-Computer Interface) ka si synim të studiojë tre gjëra njëkohësisht. I pari është implanti N1, pajisja kompjuterike e trurit të Neuralink. I dyti është roboti R1, roboti kirurgjik që në fakt implanton pajisjen. I treti është aplikacioni i përdoruesit N1, softueri që lidhet me N1 dhe përkthen sinjalet e trurit në veprime kompjuterike. Neuralink thotë se po planifikon të testojë sigurinë dhe efikasitetin e të tre pjesëve të sistemit.
Ata që marrin pjesë në Studimin PRIME fillimisht do të marrin pjesë në një studim 18-mujor që përfshin nëntë vizita me studiues. Pas kësaj, ata do të kalojnë të paktën dy orë në javë në seancat kërkimore të ndërfaqes të Neuralink dhe më pas do të bëjnë 20 vizita të tjera gjatë pesë viteve të ardhshme. Neuralink nuk thotë se sa persona po kërkon ose kur planifikon të fillojë studimin, por thotë se planifikon vetëm të kompensojë “kostot e lidhura me studimin” si udhëtimi për në dhe nga vendi i studimit.
