Një listë me specifikat e supozuara të Xiaomi 14 Ultra është shfaqur në internet vetëm disa javë përpara se Xiaomi pritet të prezantojë zyrtarisht celularin. Seria Xiaomi 14 do të vijë globalisht më 25 shkurt, gjatë MWC 2024, pas debutimit në tregun kinez vitin e kaluar.
Por pjesa më interesante e këtij prezantimi do të jetë Xiaomi 14 Ultra, modeli më premium që premton performancën më të mirë në të gjithë sektorët e smartphone-it. Informatori shpesh i besueshëm Yogesh Brar, shpërndau disa detaje përmes një postimi në X. Sipas publikuesit, Xiaomi 14 Ultra do të vijë me një ekran 6.73 inç QHD+ AMOLED LTPO me një shpejtësi rifreskimi 120 Hz, plus një bateri të madhe 5,300 mAh që mbështet karikimin me tela 90 W.
Brar nuk përmendi asgjë në lidhje me karikimin wireless, por duke ditur historikun e Xiaomi me pajisjet Ultra, është pothuajse 100% e sigurt që edhe ky telefon do ta mbështesë atë. Për të ofruar eksperiencën më të mirë për përdoruesit, Xiaomi 14 Ultra do të fuqizohet nga procesori Qualcomm Snapdragon 8 Gen 3.
Seritë Ultra të Xiaomi-t vijnë gjithashtu me avantazhe mjaft të qarta në krahasim me produktet e tjera në pjesën e kamerave. Xiaomi 14 Ultra supozohet të përfshijë një konfigurim me katër kamera, si paraardhësi i tij, duke shfaqur një sensor të fuqishëm 50 MP 1 inç Leica, një lente ultra të gjerë 50 MP, një telefoto 50 MP 3.2x dhe një kamerë tjetër telefoto 50 MP 5x. Brar shton gjithashtu se në pjesën e parme do të gjendet një kamerë 32 MP, e gatshme për të kapur disa selfie me cilësi mjaft të lartë.
Na mbetet të presim deri në datën 25 shkurt për të konfirmuar zyrtarisht të gjitha këto raportime.
