Ndërsa tregu i smartphone-ve të palosshëm po rritet dita-ditës, prodhuesit po kërkojnë një mënyrë për të ofruar versione me çmim të përballueshëm të telefonave të tyre.
Motorola ishte kompania e parë këtë vit që tentoi me Motorola Razr 40, por Samsung duket se nuk e mori përsipër rrezikun e prodhimit të një serie të re. Kjo gjë pritet të ndryshojë vitin e ardhshëm, sipas një raporti nga Revegnus – i cili ndau disa informacione pikante në lidhje me sensorët e ardhshëm të kamerës së Samsung.
Pas prezantimit të Galaxy Z Fold6 dhe Z Flip6 vitin e ardhshëm, Samsung po kërkon të lëshojë versionet Fan Edition të këtyre smartphone-ve.
Kjo nuk do të thotë se ato do të jenë të disponueshme që në fillim të vitit të ardhshëm, por duket sikur një zhvillim do ta kemi shumë pranë. Raporti sugjeron gjithashtu që Samsung do të fokusohet më shumë në reklamimin e Fan Edition duke filluar me Galaxy S23 FE të planifikuar, që do të thotë se kompania do të fillojë të lëshojë pajisjet Fan Edition më rregullisht.
