Një raportim i ri nga Koreja e Jugut pretendon se Qualcomm po shqyrton Samsung Foundry për të prodhuar një version alternativ të fuqishëm të çipit të ardhshëm Snapdragon 8 Elite Gen 2. Sipas Business Post, testimet e para të këtij çipi tashmë kanë nisur dhe bëhet fjalë për një variant që përdor procesin 2nm të Samsung. Ky version mendohet të jetë çipi “For Galaxy” i dedikuar për serinë Galaxy S26, me prodhimin masiv që pritet të përfundojë në gjysmën e dytë të vitit.
Aktualisht, drejtori i Foundry në Samsung, Han Jin-man, është në proces për të marrë miratimin për të vazhduar me procesin 2nm. Megjithatë, raporti shpreh optimizëm.
Ndërkohë, Qualcomm duket se do të vazhdojë bashkëpunimin me TSMC për një version tjetër të Snapdragon 8 Elite me proces 3nm, duke mbajtur kështu të njëjtën teknologji themelore për versionin e zakonshëm të çipit. Samsung, nga ana tjetër, ka deklaruar që në vitin 2023 synimet për të prodhuar çipe 2nm në 2025 dhe të kalojë në 1.4nm deri në vitin 2027. Procesi 2nm i Samsung pretendohet se përmirëson performancën me 12% dhe kursen energji me 25%.
Në këtë kontekst, Qualcomm po vlerëson mundësinë e ndarjes së prodhimit mes Samsung dhe TSMC për teknologjinë më të fundit të çipeve, por duket se për momentin TSMC mbetet partneri kryesor për procesin 3nm.
