Foxconn ka nisur fazën e parë të prodhimit të iPhone 15 që konsiston në testimin e prodhimit të kësaj serie, të njohur si NPI (New Product Introduction). Gjatë kësaj faze do të identifikohen të gjitha problemet e lidhura me proçesin e planifikuar të prodhimit, si dhe identifikimi i mundësive për të rafinuar këtë proçes.
Dhe pse numri i smartphone-ve të prodhuar do të jetë shumë i vogël, në fazën NPI do të përdoret një linjë e vërtetë prodhimi. iPhone 15 do të prodhohet duke përdorur të njejtat proçese dhe pajisje që pritet të përdoren dhe gjatë prodhimit në masë.
Qëllimi kryesor është sigurimi që gjithçka e përfshirë në planin e prodhimit të smartphone-ve të rinj funksionon siç duhet, për të shmangur problemet në fazën e prodhimit në masë. Sigurisht në të njejtën kohë inxhinierët do të shikojnë për mënyra të reja se si mund të rrisin efiçiencën e proçesit ose të reduktojnë kostot e prodhimit.
Këtë vit pritet që linja e iPhone 15 të jetë e njejtë me atë të iPhone 14, me 4 smartphone: iPhone 15, iPhone 15 Plus, iPhone 15 Pro dhe iPhone 15 Pro Max / Ultra. Megjithatë mund të bëhen ndryshime me kalimin e kohës, pasi modeli iPhone 14 Plus nuk është pritur nga publiku ashtu siç mendohej, duke shitur shumë pak pajisje.
